Pas një operacioni të koordinuar midis Komisariatit të Policisë Kuçovë, Prokurorisë Berat dhe Forcës së Posaçme Operacionale të DVP Tiranë, dy persona janë vënë në pranga si autorë të dyshuar për të shtënat me armë zjarri në qytetin e Kuçovës. Ngjarja u raportua më 23 gusht 2026, rreth orës 15:40, kur 24-vjeçari me iniciale S. R. njoftoi policinë se ishte qëlluar në drejtim të automjetit të tij të parkuar në lagjen 1 Maji.
Në pranga kanë rënë shtetasit A. Ç. (alias A. Gj.), 32 vjeç, dhe A. Xh., 49 vjeç, të dy banues në Kuçovë. Gjatë kontrollit të ushtruar në banesën e 49-vjeçarit, në tarracë u gjetën dhe u sekuestruan një armë zjarri dhe disa fishekë, të cilat dyshohet se janë përdorur në këtë ngjarje.
Ndaj personave të arrestuar rëndojnë akuzat si më poshtë:
- A. Ç.: “Mbajtja pa leje e armëve dhe municionit”, “Kanosja” dhe “Shkatërrimi i pronës”.
- A. Xh.: “Përkrahja e autorit të krimit” dhe “Veprime që pengojnë zbulimin e së vërtetës”.
Gjithashtu, autoritetet kanë proceduar në gjendje të lirë 65-vjeçarin S. Gj., banues në Kuçovë, për veprën penale “Veprime që pengojnë zbulimin e së vërtetës”. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat për hetime të mëtejshme.