Policia e Tiranës arrestoi Elvis Koçeku-n, 32 vjeç, banues në fshatin Grudë e Re të Shkodrës, pasi dyshohet se më 16 janar 2026 tentoi të vrasë me armë zjarri shtetasin A. M., 21 vjeç, në zonën "Kryqëzimi i Vinotekës" në Shkodër. Ngjarja u zhvillua pas një konflikti për motive të dobëta.
Gjatë të njëjtit operacion u arrestua edhe Eduard Kësolla, 27 vjeç, banues në të njëjtin fshat, i akuzuar për "Përkrahjen e autorit të krimit", pasi drejtonte automjetin Audi me të cilin lëvizte 32-vjeçari në zonën Freskut të Tiranës. Automjeti u sekuestrua.
Arrestimet u realizuan nga Drejtoria e Forcës së Posaçme Operacionale në bashkëpunim me Prokurorinë e Shkodrës, në kuadër të operacionit të koduar "Operacionalja 89". 32-vjeçari ishte në kërkim dhe kishte precedentë për krime kundër personit dhe armëmbajtje pa leje.
Ai akuzohet për veprat penale "Vrasja në rrethana të tjera cilësuese mbetur në tentativë", "Prishja e qetësisë publike" dhe "Mbajtja pa leje dhe prodhimi i armëve e municionit". Materialet procedurale i kaluan Prokurorisë për veprime të mëtejshme ligjore.