Një 19-vjeçar është arrestuar në Shkodër nga strukturat e policisë në kuadër të operacionit të koduar “Livadhet 3”. Shtetasi Ornaldo Çerenishta, banues në Shkodër, u vu në pranga pas kontrollit në banesën e tij, të kryer në zbatim të vendimit të Gjykatës së Shkodrës.
Operacioni u zhvillua nga Sektori për Hetimin e Krimeve të Rënda, nën drejtimin e Prokurorisë, në bashkëpunim me Seksionin për Hetimin e Krimeve Ekonomiko-Financiare dhe Komisariatin e Policisë Shkodër, me mbështetjen e Forcës së Posaçme “Shqiponja” dhe Forcës Kombëtare të Sigurisë, Njësia Shkodër. Kontrollet u kryen në banesat e disa shtetasve të dyshuar për veprat penale “Vjedhja” dhe “Mbajtja pa leje dhe prodhimi i armëve, armëve shpërthyese dhe i municionit”, në lidhje me operacionet e mëparshme “Livadhet 1” dhe “Livadhet 2”.
Gjatë kontrollit në banesën e Çerenishtës u gjetën dhe sekuestruan në cilësinë e provës materiale:
- 164 300 euro të dyshuara të falsifikuara;
- municion luftarak;
- 8 celularë;
- një sasi lënde djegëse;
- 1 automjet i dyshuar i vjedhur në Fushë Krujë në vitin 2019;
- 2 targa të dyshuara të vjedhura në Tiranë në vitin 2025.
Ndaj të arrestuarit rëndojnë dyshimet për veprat penale “Vjedhja” dhe “Mbajtja pa leje dhe prodhimi i armëve, armëve shpërthyese dhe i municionit”. Policia njofton se vijon puna intensive për dokumentimin e plotë të veprimtarisë kriminale të tij. Materialet procedurale iu referuan Prokurorisë së Shkodrës për veprime të mëtejshme.