Gjatë një harku kohor prej 24 orësh, Policia e Shtetit ka zhvilluar një sërë operacionesh për të goditur armëmbajtjen pa leje dhe trafikimin e armëve. Në Fier dhe Mallakastër, policia finalizoi operacionet e koduara “Aksi” dhe “Hidden Guns”, ndërsa në Maminas të Durrësit operacionin “Hallkat”.
Në Bypass-in e Fierit, gjatë operacionit “Aksi”, u arrestuan Miklejin Monce, 19 vjeç, dhe pasagjeri Flavio Bregu, 28 vjeç, të dy banues në Vlorë. Gjatë kontrollit të automjetit, policia sekuestroi një pistoletë, për të cilën hetimet sugjerojnë se ishte destinuar për shitje në Fier. Në Mallakastër, gjatë operacionit “Hidden Guns”, u vu në pranga Ilir Sinaj, 38 vjeç, banues në fshatin Lofkënd. Arrestimi i tij pasoi kanosjen e një shtetasi me armë gjahu, ndërsa në banesë iu gjetën një automatik tip kallashnikov dhe një armë gjahu.
Ndërkohë, në Maminas të Durrësit, gjatë operacionit “Hallkat”, policia goditi një rast të trafikimit të armëve nga Kosova drejt Shqipërisë. Në pranga përfunduan M. B., 34 vjeç, banues në Kukës, i akuzuar për trafikim të armëve, dhe D. N., 39 vjeçe, nga Prizreni, e dyshuar për moskallëzim krimi. Gjatë kontrollit të automjetit, policia sekuestroi tri pistoleta dhe 34 fishekë, ndërsa në banesën e 34-vjeçarit u gjet edhe një dorezë hekuri.
Të gjitha materialet procedurale u janë referuar prokurorive përkatëse për hetime të mëtejshme mbi përfshirjen e mundshme të grupeve kriminale në këto aktivitete të paligjshme.