Strukturat e Drejtorisë Vendore të Policisë Tiranë kanë finalizuar brenda një harku kohor prej 24 orësh dy operacione policore me qëllim parandalimin e ngjarjeve kriminale dhe goditjen e fenomenit të armëmbajtjes pa leje.
Në Tiranë, në kuadër të operacionit të koduar "Qëllimi", Forca e Posaçme "Shqiponja" në bashkëpunim me Komisariatin e Policisë Nr. 4, ka ndaluar 36-vjeçarin Adi Zavalani. Gjatë kontrollit në banesën e tij, policia ka sekuestruar dy armë zjarri (pistoletë dhe automatike), municion luftarak, një shënjestër optike, dy mjete prerëse dhe një peshore elektronike. Policia ka bërë me dije se shtetasi në fjalë ka precedentë të mëparshëm penalë.
Ndërkohë, në fshatin Brret të Krujës, shërbimet e Komisariatit të Policisë Krujë kanë finalizuar operacionin e koduar "Kontrolli", duke arrestuar 28-vjeçarin Fatos Lika. Në banesën e tij, autoritetet kanë gjetur dhe sekuestruar një armë gjahu, 84 fishekë dhe 17 kapsolla elektrike, të cilat posedoheshin pa lejen përkatëse.
Materialet procedurale janë referuar në Prokurori për veprime të mëtejshme. Policia e Shtetit vijon hetimet për të zbardhur dhe dokumentuar përfshirjen e mundshme të të arrestuarve në veprimtari të tjera kriminale.