Gjatë 24 orëve të fundit, shërbimet e Policisë së Tiranës kanë finalizuar dy operacione për parandalimin dhe goditjen e armëmbajtjes pa leje, duke arrestuar tre persona.
Në kuadër të operacionit të koduar "Shenja", të zhvilluar nga Forca e Posaçme "Shqiponja" në bashkëpunim me Komisariatin e Policisë Nr. 4, u ndaluan shtetasit Sh. S., 31 vjeç, dhe Sh. Sh., 43 vjeç. Ata u kapën duke lëvizur me automjet në Rrugën e Dibrës, ndërsa 31-vjeçarit iu gjet një pistoletë me municion. Gjatë verifikimeve, rezultoi se 43-vjeçari kishte thyer masën e sigurisë "Arrest në shtëpi".
Ndërkohë, operacioni "Kodra" u finalizua nga specialistët e Komisariatit të Policisë Nr. 6, të cilët arrestuan shtetasin F. H., 69 vjeç. Gjatë kontrollit në banesën e tij në fshatin Kodër Kashar, policia gjeti një pistoletë, një armë gjahu dhe 112 fishekë. Sipas autoriteteve, armët dyshohet se mbaheshin me qëllim shitjen.
Materialet procedurale i janë referuar Prokurorisë së Tiranës për veprime të mëtejshme hetimore.
Përditësime
Policia e Shtetit ka identifikuar tre të arrestuarit gjatë operacionit të fundit në Tiranë, ku u sekuestruan armë zjarri. Në pranga kanë rënë shtetasit Shendi Sata, Shemsi Shaljani dhe Fatbardh Hyka, të cilët akuzohen për armëmbajtje pa leje. Hetimet për zbardhjen e plotë të rastit vijojnë.