Shërbimet e Komisariatit Nr. 4 të Policisë së Tiranës arrestuan në flagrancë Ligor Mehmetin, 48 vjeç, banues në Tiranë, në kuadër të operacionit të koduar Barriera. Ngjarja ndodhi në rrugën Myslym Keta, në zonën e Tufinës, ku Mehmeti udhëtonte me automjetin e tij.
Nga kontrolli i automjetit u gjetën dhe u sekuestruan 3 armë zjarri: 2 pistoleta dhe 1 armë taktike luftarake, së bashku me 3 krehra me municion. Dyshohet se këto armë i posedonte me qëllim shitjen në zonat Fresku dhe Tufinë. Sipas informacioneve nga gazetari Sokol Dema i Report Tv, pistoletat do shiteshin për 1500 euro secila, ndërsa arma taktike për 8000 euro.
Policia sekuestroi po ashtu automjetin dhe celularin e Mehmetit si prova materiale. Mehmeti dyshohet i përfshirë prej kohësh në trafikun e armëve. Hetimet, nën drejtimin e Prokurorisë së Tiranës, vazhdojnë për të identifikuar shtetas të tjerë të mundshëm të përfshirë.
Materialet procedurale iu referuan Prokurorisë pranë Gjykatës së Shkallës së Parë të Tiranës për veprime të mëtejshme mbi veprën penale të mbajtjes pa leje dhe prodhimit të armëve, armëve shpërthyese dhe municionit. Policia publikoi pamjet e aksionit, ku shihet ndjekja, rrethimi dhe prangosja e të arrestuarit.