Policia e Tiranës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, finalizoi operacionin policor të koduar "Lockdown". Operacioni u zhvillua pas një hetimi dy mujor me metoda proaktive nga Komisariati i Policisë Nr. 3 dhe synoi goditjen e një grupi kriminal që trafikonin armë zjarri kryesisht nga Kosova në Tiranë për shitje.
Janë vënë në pranga katër shtetas banues në Tiranë:
• Gloris Nezaj, 39 vjeç
• Rezarto Rumi, 48 vjeç
• Kelvin Caushi, 49 vjeç
• Ardjan Caushi, 45 vjeç
Nga hetimet dyshohet se këta shtetas siguronin armët nga Kosova, i sillnin në Tiranë, i modifikonin dhe i magazinonin në një ambient të përshtatur në zonën e Selitës.
Gjatë kontrollit në ambientin e përshtatur dhe banesat e tyre, shërbimet e policisë sekuestruan:
• 8 armë zjarri (5 pistoleta dhe 3 automatikë)
• Pjesë të ndryshme armësh
• Një armë gjahu
• Krehra dhe municion luftarak
• 3 radio si ato të policisë
• Një jelek multifunksional
• 9 celularë
Nën drejtimin e Prokurorisë, puna hetimore vijon për identifikimin dhe kapjen e personave të tjerë të përfshirë në këtë veprimtari kriminale. Materialet procedurale i kaluan Prokurorisë për veprime të mëtejshme ligjore.