Shërbimet e Komisariatit të Policisë Shkodër kanë arrestuar shtetasin Roberto Malocaj, 21 vjeç, banues në fshatin Trush. Arrestimi i tij u bë i mundur pas administrimit të informacioneve të siguruara në rrugë operative, me synim parandalimin e paligjshmërive.
Në kuadër të operacionit policor të koduar "Kalibri", gjatë kontrollit të ushtruar në banesën e 21-vjeçarit, efektivët gjetën dhe sekuestruan një arsenal prej 4 armësh: një automatik, një pushkë dhe dy armë gjahu, si dhe një sasi të konsiderueshme municioni luftarak.
Sendet e sekuestruara janë dërguar për ekzaminim pranë Institutit të Policisë Shkencore, për të verifikuar nëse armët janë përdorur në ngjarje të mëparshme kriminale. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, e cila vijon hetimet për zbardhjen e plotë të rrethanave të rastit.