Policia e Shkodrës ka zbardhur ngjarjen e ndodhur më 9 mars 2026, rreth orës 15:10, në lagjen "Guerrile", ku gjatë ndjekjes së një automjeti u kanosën me armë zjarri punonjësit e saj.
Gjatë patrullimit në zonë, efektivët i bënë shenjë ndalimi automjetit, të cilin e drejtonte Ervis Baba, 43 vjeç, banor i lagjes "Guerrile". Ky i fundit nuk iu bind urdhrit, shtoi shpejtësinë dhe kryen manovra të rrezikshme. Për këtë arsye, shërbimet e policisë i ranë në ndjekje.
Gjatë ndjekjes, dyshohet se Bajrush Bregu (B. B.), 40 vjeç, banor i të njëjtës lagje dhe me precedentë penalë për armëmbajtje pa leje, prodhim dhe shitje narkotikësh si dhe vjedhje, zbriti nga automjeti dhe qëlloi me pistoletë në ajër për të kanosur punonjësit e policisë.
Në kuadër të operacionit të koduar "Risku", të zhvilluar nga Seksioni për Hetimin e Krimeve Ndaj Personit, Forca e Posaçme "Shqiponja" dhe Komisariati i Policisë Shkodër, u arrestuan në flagrancë Ervis Baba dhe një 17-vjeçar, pasagjer në automjet.
- Gjendet dhe sekuestrohet arma e zjarri tip pistoletë me municion, e përdorur në ngjarje.
- Sekuestrohet edhe automjeti tip "Seat Volkswagen".
Vijon puna për kapjen e Bajrush Bregut. Materialet procedurale i janë referuar Prokurorisë së Shkodrës për veprime të mëtejshme, nën akuzat për kanosje, mosbindje ndaj urdhrit të policisë, prishje të qetësisë publike dhe prodhim ose mbajtje pa leje të armëve dhe municionit.
Përditësime
- Ervis Baba mohoi njohjen e Bregut gjatë dëshmisë. Tha se e mori rastësisht në rrugë pasi i zgjati dorën.
- 17-vjeçari ruajti heshtje gjatë pyetjes.
- Policia sekuestroi një gëzhojë plumbi dhe një pistoletë me karikator pranë vendit të ngjarjes, në rrugicën e lagjes Kiras.
- Gëzhoja nuk përputhet me pistoletën e gjetur.
Ervis Baba dëshmoi se mori rastësisht një person në rrugë dhe mohoi çdo lidhje me të: “Një person më nxori dorën në rrugë teksa po ecja me makinë. U ndala dhe e mora, por nuk e njoh dhe nuk kam asnjë lidhje me të”. Ai specifikoi se nuk e di nëse personi ishte Bajram Bregu apo dikush tjetër.