Policia e Shkodrës shpalli në kërkim tre persona pas dy ngjarjeve të ndodhura në qytet më 11 dhe 12 tetor 2026. Sipas njoftimit të policisë, njëri prej tyre dyshohet për tentativë vrasjeje, ndërsa dy të tjerët për kanosje me armë zjarri dhe dëmtime me dashje.
Ngjarja në fushën sportive
Më 11 tetor, Klaus Fermosi, 25 vjeç, dyshohet se hyri në një fushë sportive, të njohur si kalçeto, në Shkodër dhe i drejtoi armën 27-vjeçarit Jozefin Ujka, me qëllim vrasjen e tij. Policia e shpalli në kërkim për veprat penale “Vrasje me paramendim e mbetur në tentativë” dhe “Mbajtja pa leje dhe prodhimi i armëve, armëve shpërthyese dhe i municionit”.
Ngjarja në lokal
Më 12 tetor, në një lokal në Shkodër, Florild Gjelaj, 40 vjeç, dhe Fadjol Saraçi, 37 vjeç, dyshohet se kanosën me armë zjarri dhe goditën me grushte një 38-vjeçar. Sipas policisë, ai pësoi dëmtime në fytyrë.
Gjelaj dhe Saraçi u shpallën në kërkim për veprat penale “Mbajtja pa leje dhe prodhimi i armëve shpërthyese dhe i municionit”, “Kanosja” dhe “Dëmtime të tjera me dashje”, të kryera në bashkëpunim. Policia njoftoi se po vijon puna për kapjen e të tre personave.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme. Të dyshuarit prezumohen të pafajshëm derisa fajësia e tyre të vërtetohet me vendim gjyqësor të formës së prerë.