Një ngjarje e rëndë ka ndodhur mbrëmjen e së premtes, më 31 korrik 2026, në qytetin e Skenderajt. Rreth orës 23:25, në rrugën “Fatmir Dibra”, një person është plagosur me armë zjarri. Viktima, një shtetas kosovar i identifikuar si L.Z., ka marrë plagë në shputën e këmbës së majtë. Pas ngjarjes, ai është dërguar fillimisht në Qendrën Kryesore të Mjekësisë Familjare në Skenderaj dhe më pas në Spitalin Rajonal të Mitrovicës për trajtim mjekësor. Pas ndihmës së marrë, viktima është liruar për në shtëpi.
Autoritetet policore kanë kryer ekzaminimin e vendit të ngjarjes, ku kanë sekuestruar tri gëzhoja të armës së shkurtër, të cilat do t’i nënshtrohen ekzaminimeve forenzike. Sipas burimeve, Policia e Kosovës ka arritur të identifikojë 19-vjeçarin Rinor Kuliqi si të dyshuar për kryerjen e kësaj vepre. I dyshuari është shpallur në kërkim policor, pasi ende nuk është bërë i mundur arrestimi i tij.
Me urdhër të Prokurorit të Shtetit, rasti është iniciuar dhe po trajtohet si “vrasje në tentativë”. Njësia Rajonale e Hetimeve në Mitrovicën e Jugut është duke vazhduar hetimet për zbardhjen e plotë të rrethanave dhe motiveve që çuan deri te ky incident. Personat e përfshirë në këtë hetim prezumohen të pafajshëm derisa fajësia e tyre të vërtetohet me vendim të formës së prerë nga gjykata.
Përditësime
Hetuesit policorë kanë zgjeruar operacionin pas identifikimit të viktimës, 25-vjeçarit Liridon Zekaj. Gjatë bastisjes në shtëpinë e të dyshuarit Rinor Kuliqi në fshatin Abri e Poshtme, policia sekuestroi armën e zjarrit që dyshohet se u përdor në plagosje. Arma u gjet në posedim të vëllait 15-vjeçar të të dyshuarit, A.K., i cili pas intervistimit është liruar në procedurë të rregullt.
Policia e Kosovës ka arrestuar sot 19-vjeçarin Rinor Kuliqi, i cili ishte në kërkim për plagosjen me armë zjarri në Skenderaj. Ndaj tij është caktuar masa e ndalimit policor prej 48 orësh, ndërsa pritet dërgimi para prokurorisë për procedurat e mëtejshme.