Një 44-vjeçar mbeti i plagosur nga armë zjarri në mbrëmjen e 9 marsit 2026 në rrugën “28 Nëntori” në Skenderaj. Policia e Kosovës pranoi informacionin për të shtënat rreth orës 21:04.
Zëdhënësi i Policisë për rajonin e Mitrovicës, Avni Zahiti, njoftoi se një person i moshës madhore u plagos dhe u dërgua për trajtim mjekësor në spital. Në vendin e ngjarjes u gjetën gëzhoja, ndërsa njësitë policore po kryejnë hetime për identifikimin dhe arrestimin e personit të dyshuar.
Lidhur me gjendjen shëndetësore të të lënduarit foli zëdhënësi i Spitalit të Përgjithshëm “Dr. Sami Haxhibeqiri” në Mitrovicë, Shpend Fazliu. Ai deklaroi se pacienti u soll në Shërbimin Emergjent në orën 21:37. “Aktualisht, me parametra stabilë, jashtë rrezikut për jetë, po vazhdojnë ekzaminimet radiologjike dhe trajtimi mjekësor”, tha Fazliu.