Shërbimet e Forcës së Posaçme Shqiponja të Policisë së Shkodrës arrestuan në flagrancë 19-vjeçarin Bajram Hoxha, banues në Shkodër, pas mesnate në lagjen Guerile. Ngjarja ndodhi gjatë një patrullimi për identifikimin e personave që qarkullojnë me armë zjarri pa leje, bazuar në informacione operative.
Pas konstatimit të dy shtetasve, të cilët u larguan me vrap sapo panë policinë, shërbimet ndoqën dhe kontrolluan fizikisht Bajram Hoxha. Atij iu gjet një armë zjarri pistoletë, municion luftarak dhe një mjet prerës thikë. Armët u sekuestruan.
Specialistët për Hetimin e Krimeve të Komisariatit të Policisë Shkodër kryen veprimet procedurale dhe arrestuan Bajram Hoxha për qarkullim me armë pa leje. Ndërkohë, shtetasi E. Ç., 29 vjeç, u procedua në gjendje të lirë për veprën penale moskallëzim krimi.
Materialet procedurale iu referuan Prokurorisë pranë Gjykatës së Juridiksionit të Përgjithshëm Shkodër për veprime të mëtejshme.