Policia e Shkodrës zhvilloi një operacion për kapjen e Bajram Bregut (alias Barush Bregu) pasditen e 10 marsit rreth orës 15:10, në lagjen Kiras. Gjatë patrullimit në zonën Guerrile, një patrullë e forcave Shqiponja i bëri shenjë ndalimi automjetit të drejtuar nga Ervis Baba (43 vjeç), ku ndodheshin Bregu dhe një 17-vjeçar. Drejtuesi nuk iu bind urdhrit dhe shtoi shpejtësinë, duke kryer manovra të rrezikshme.
Në një rrugicë të lagjes Kiras, dyshohet se Bajram Bregu zbriti nga automjeti, vrapoi dhe qëlloi një herë në ajër me pistoletë për të kanosur policinë. Menjëherë pas kësaj, policia rrethoi zonën dhe kërkoi mbështetje, por Bregu u arratis duke përdorur oborret dhe bahçet e brendshme. Ai ishte i shpallur në kërkim për vepra të tjera penale dhe dyshohet si person i afërt me anëtarët e fisit Lici, si dhe si "ushtar" i Ibrahim Licit në përplasje mes grupeve rivale.
Policia arrestoi Ervis Babën dhe 17-vjeçarin. Gjatë marrjes në pyetje, Baba mohoi njohjen me Bregun dhe deklaroi: "Një person më nxori dorën në rrugë teksa po ecja me makinë. U ndala dhe e mora, por unë nuk e njoh se kush ishte. Nuk kam asnjë lidhje me të dhe nuk e di nëse ishte Bajram Bregu apo dikush tjetër."
17-vjeçari mbajti heshtje totale.
Gjatë kontrolleve, policia sekuestroi një gëzhojë plumbi dhe një pistoletë me karikator pranë vendit të ngjarjes. Ekspertiza paraprake tregoi se gëzhoja nuk përputhet me pistoletën e gjetur, duke shtuar dyshimet se Bregu kishte një armë tjetër që e mori me vete gjatë arratisjes. Kërkimet për Bregun vazhdojnë.