Shërbimet e Policisë së Pogradecit arrestuan në flagrancë dy shtetas në kuadër të operacionit të koduar "Fast". Ngjarja ndodhi në lagjen nr. 3 të Pogradecit, ku Marjo Xhangolli, 33 vjeç, dhe Aljan Hilaj, 32 vjeç, banues në Pogradec, tentuan të merrnin me forcë në automjetin e tyre një 17-vjeçar.
Pas një konflikti për motive të dobëta, të arrestuarit ushtruan dhunë fizike ndaj të miturit dhe e plagosën me thikë në dorë. 17-vjeçari mori mjekim në spital dhe ndodhet jashtë rrezikut për jetën.
Menjëherë pas njoftimit për konfliktin, shërbimet policore ndërhynë për të parandaluar përshkallëzimin e situatës. Të dyshuarit u larguan nga vendngjarja me automjet, por u identifikuan dhe u kapën në bashkëpunim me Stacionin e Policisë Prrenjas.
Ndaj tyre rëndojnë akuzat për veprat penale “Heqja e paligjshme e lirisë”, kryer në bashkëpunim dhe mbetur në tentativë, si dhe “Plagosja e lehtë me dashje”, kryer në bashkëpunim. Materialet procedurale iu referuan Prokurorisë së Korçës për veprime të mëtejshme.
Policia publikoi pamje video nga ngjarja, që tregojnë momentin e tentativës për marrje me forcë të të miturit.