Tetë persona janë arrestuar në Britaninë e Madhe në kuadër të një hetimi për një rrjet ndërkombëtar burrash, të cilët dyshohen se kanë droguar dhe abuzuar seksualisht me gra. Lajmi u bë i ditur nga Agjencia Kombëtare e Krimit (NCA), institucioni britanik përgjegjës për hetimin e veprave të rënda penale dhe krimit të organizuar.
Hetimi nisi pas zbulimit në vitin 2025 nga gazetarë gjermanë të një forumi online, ku shkëmbeheshin materiale rreth këtyre krimeve. Pas kësaj, NCA identifikoi një rrjet me anëtarë në dhjetëra shtete në të gjitha kontinentet. Autoritetet njoftuan se deri më tani janë identifikuar mbi 270 persona të lidhur me platformën, identiteti i së cilës mbetet i paekspozuar për arsye hetimore.
Zëvendësdrejtori i NCA, Nigel Leary, deklaroi se sulmet seksuale të lehtësuara nga përdorimi i lëndëve narkotike po bëhen gjithnjë e më të organizuara, duke u favorizuar nga platformat dixhitale. Ai e përshkroi shkallën e këtij fenomeni si "thellësisht shqetësuese". Aktualisht, krahas arrestimeve në Britani, janë duke u zhvilluar edhe 14 hetime të tjera në vende të ndryshme.
Ky rast ka rikthyer në vëmendjen e opinionit publik historinë e shtetases franceze Gisèle Pélicot, e cila për vite me radhë u drogua nga bashkëshorti i saj, Dominique Pélicot, i cili ftonte burra të panjohur për të kryer marrëdhënie seksuale me të pa dijeninë e saj. Pas gjyqit të këtij rasti, ngjarje të ngjashme janë raportuar në disa vende të Evropës, me theks të veçantë në Gjermani dhe Holandë.