Strukturat e Komisariatit të Policisë në Cërrik kanë ndërmarrë një operacion për goditjen e krimeve kundër mjedisit në fshatin Gostimë. Sipas njoftimit zyrtar, hetimet zbuluan se një subjekt po ushtronte gërryerje të paligjshme të shtratit të lumit Devoll, duke dalë jashtë koordinatave të lejuara në dokumentacionin e aktivitetit të tyre. Si pasojë e ndërhyrjes me mjete të rënda, rrjedha e ujit është devijuar, duke krijuar rrezik për përmbytjen e tokave bujqësore përreth.
Në pranga kanë rënë shtetasit:
• L. X., 35 vjeç, banues në Cërrik;
• L. B., 42 vjeç, shtetas indian me banim në Cërrik;
• B. T., 46 vjeç, banues në fshatin Shalës.
Ndërkohë, policia ka shpallur në kërkim administratorin e subjektit, shtetasin K. H., 22 vjeç. Gjatë operacionit, forcat e rendit sekuestruan një ekskavator dhe një kamion teknologjik, të cilët dyshohet se përdoreshin për realizimin e kësaj veprimtarie të kundërligjshme. Hetimet e mëtejshme zbuluan gjithashtu se shtetasi B. T. kishte kryer ndërtime pa leje në afërsi të zonës ku operonte subjekti i administruar nga i afërmi i tij, K. H..
Krahas procedimit penal, subjekti u ndëshkua me masa administrative nga strukturat kompetente të Inspektoratit Kombëtar të Mbrojtjes së Territorit (IKMT) në Tiranë dhe Inspektoratit të Mbrojtjes së Territorit (IMT) të Cërrikut. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme, ndërsa vijon puna intensive për kapjen e administratorit të shpallur në kërkim.
Përditësime
Policia e Cërrikut ka vënë në pranga tre persona për krime mjedisore. Për gërryerjen e paligjshme të shtratit të lumit Devoll, në bashkëpunim me subjektin ekonomik "Vëllezërit Hysa", janë arrestuar Lorenc Xibraku, 35 vjeç, dhe shtetasi indian Lalchand Bhuria, 42 vjeç. Në të njëjtën zonë, policia ka arrestuar edhe Behar Trokën, 46 vjeç, për veprën penale të ndërtimit pa leje.