Tre shtetas janë arrestuar nga Komisariati i Policisë Lezhë, pak minuta pasi një 70-vjeçar denoncoi rrëmbimin e djalit të tij 28-vjeçar. Të arrestuarit janë vëllezërit Ronaldo Marku (28 vjeç) dhe Romario Marku (22 vjeç), si dhe kushëriri i tyre, Emiliano Marku (22 vjeç).
Sipas hetimeve, të dyshuarit e morën 28-vjeçarin me forcë në një pikë karburanti në fshatin Derven të Krujës dhe e transportuan deri në fshatin Shënkoll të Lezhës. Motivi i ngjarjes dyshohet të jetë një konflikt lidhur me mospagesën e qirasë për dy automjete, të cilat ishin marrë në një subjekt të administruar nga dy vëllezërit e arrestuar.
Gjatë transportit, viktima është dhunuar fizikisht dhe më pas është braktisur në rrugë. Pas ndërhyrjes së shpejtë të policisë, autorët u kapën dhe mjeti i përdorur për transportin e të riut u sekuestrua në cilësinë e provës materiale. 28-vjeçari mori trajtim mjekësor në Spitalin Rajonal të Lezhës dhe është rikthyer në banesën e tij, jashtë rrezikut për jetën.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë. Të dyshuarit akuzohen për veprat penale:
- "Heqja e paligjshme e lirisë"
- "Vetëgjyqësia"
- "Dëmtime të tjera me dashje", kryer në bashkëpunim.