Hetuesit e Stacionit Policor Jugu në Mitrovicë kanë identifikuar dhe arrestuar një 18-vjeçare, nën dyshimin se ka ushtruar dhunë fizike ndaj një të miture 12-vjeçare. Arrestimi erdhi pas sigurimit të provave materiale, përkatësisht një videosekuence të publikuar në rrjetet sociale, në të cilën shihet momenti i sulmit fizik dhe rrahjes së viktimës.
Pas incidentit, e mitura ka kërkuar tretman mjekësor. Pas përfundimit të procedurave të intervistimit, me vendim të prokurorit kompetent, ndaj të dyshuarës është caktuar masa e ndalimit policor për 48 orë. Rasti është iniciuar si vepër penale e Lëndimit të lehtë trupor dhe po hetohet nga autoritetet në koordinim me Prokurorinë.
Lidhur me këtë ngjarje ka reaguar Koalicioni i OJQ-ve për Mbrojtjen e Fëmijëve (KOMF), duke shprehur shqetësim të thellë për pamjet e dhunës së ushtruar. KOMF ka theksuar se dhuna ndaj fëmijëve nuk mund të trajtohet si incident i izoluar dhe ka kërkuar aktivizimin e menjëhershëm të mekanizmave për mbrojtjen e fëmijëve, përfshirë Qendrat për Punë Sociale dhe shërbimet psiko-sociale, për rehabilitimin e viktimës. Gjithashtu, organizata ka bërë thirrje për fuqizimin e shërbimeve parandaluese, edukimit në shkolla dhe mbështetjen e shëndetit mendor për të parandaluar ciklin e dhunës.
Përditësime
Hetimet e mëtejshme zbuluan se videoja e dhunës është xhiruar nga një bashkëmoshatare e viktimës. Autoret dhe viktima kanë qenë nxënëse të të njëjtës shkollë fillore. Policia sqaroi se videoja është përdorur si mjet kërcënimi ndaj një të miture tjetër, duke u shpërndarë me qëllim frikësimin e saj.