Shërbimet e Komisariatit të Policisë Krujë finalizuan operacionin për kapjen e 21-vjeçarit Marvin Ferra, i cili kërkohej për vepra penale kundër pasurisë. Ngjarja për të cilën ai ishte shpallur në kërkim lidhet me grabitjen e një pike karburanti në zonën e Krastës, të ndodhur më 15 qershor.
Sipas hetimeve, i riu dyshohet se më 19 qershor ka hyrë i maskuar dhe i armatosur në oborrin e një shtetaseje me inicialet M.K., në fshatin Radë, me qëllim vjedhjen. Gjatë përpjekjes për t'u ndaluar nga forcat e rendit, Ferra nuk i është bindur urdhrave dhe ka tentuar të largohet me një automjet tip "Benz", brenda të cilit ndodhej edhe një i mitur. Ndjekja ka përfunduar me një aksident rrugor, pas të cilit autori është përpjekur të arratiset në këmbë, por është neutralizuar dhe arrestuar nga efektivët e policisë rreth 300 metra larg vendit të ngjarjes.
Gjatë marrjes në pyetje, 21-vjeçari ka pranuar autorësinë e grabitjeve dhe ka treguar vendndodhjen ku mbante të fshehura armët e përdorura. Policia ka sekuestruar në cilësinë e provës materiale një armë zjarri tip kallashnikov dhe një pushkë. Hetimet për zbardhjen e plotë të rrethanave të këtyre ngjarjeve vijojnë nga autoritetet përkatëse.
Përditësime
Policia e Shtetit ka publikuar pamjet e grabitjes së një karburanti në Krujë, ku 21-vjeçari i arrestuar shfaqet duke kërcënuar punonjësin me armë zjarri. Materialet filmike janë sekuestruar nga Prokuroria pranë Gjykatës së Shkallës së Parë të Juridiksionit të Përgjithshëm Krujë, në cilësinë e provës materiale.
Hetimet e mëtejshme të Policisë së Krujës për grabitjen e karburantit zbardhën detaje të reja:
- I mituri i përfshirë në ngjarje rezultoi bashkëpunëtor aktiv, e jo thjesht pasagjer.
- Pamjet filmike dëshmojnë momentin kur autori detyron punonjësin të hyjë brenda ambienteve të shërbimit për të mundësuar vjedhjen.
- Shuma e grabitur konfirmohet në vlerën e 20 mijë lekëve.