Një incident rrugor ka ndodhur mesditën e së hënës, rreth orës 12:45, në lagjen nr. 14 të qytetit të Durrësit, pranë tregut të fruta-perimeve. Shërbimet e Forcës së Posaçme “Shqiponja”, gjatë patrullimit, i kanë bërë shenjë ndalimi një automjeti që po lëvizte me shpejtësi, por drejtuesi i tij nuk iu bind urdhrit të policisë.
Gjatë tentativës për t’u larguar nga ndjekja, drejtuesi i automjetit, Regi Xhanari, 31 vjeç, ka përplasur 5 automjete të parkuara, duke shkaktuar dëme materiale. Pas përplasjes, ai ka braktisur mjetin dhe është larguar me vrap nga vendngjarja. Burimet zyrtare të policisë konfirmuan se nga hetimet ka rezultuar se 31-vjeçari ishte shpallur në kërkim për veprën penale “Largimi i të burgosurit nga vendi i qëndrimit”.
Xhanari kishte thyer masën e sigurisë “arrest në shtëpi”, të caktuar më herët për veprën penale të “Mashtrimit”. Aktualisht, forcat e policisë po zhvillojnë kontrolle intensive në zonë për lokalizimin dhe kapjen e tij, ndërsa grupi hetimor po punon për dokumentimin e plotë të rrethanave të ngjarjes.