Shërbimet e Policisë në Dhërmi reaguan menjëherë pas njoftimit për vjedhjen e një automjeti tip Land Rover, duke e lokalizuar dhe ndaluar atë. Drejtuesja e automjetit nuk iu bind urdhrit për ndalim dhe, gjatë manovrave për t’u larguar, shkaktoi dëmtime në mjetin e tentuar për t’u vjedhur.
Nga hetimet paraprake rezulton se ngjarja ndodhi në mbrëmjen e 30 prillit 2026. N. Xh., 25 vjeç, banues në Durrës, dhe 17-vjeçarja kishin udhëtuar drejt Dhërmi me një automjet tip Benz, fillimisht me qëllim blerjen e Land Rover-it, në përdorim nga një shtetas banues në Tiranë. Duke përfituar nga mungesa e pronarit, 17-vjeçarja e ndez automjetin dhe u largua pa leje, në bashkëpunim me 25-vjeçarin.
Automjeti Benz u përplas në zonën e Palasës dhe u braktis, ndërsa 25-vjeçari u kap në lagjen Kushtrimi të Vlorës. Në përfundim të veprimeve, N. Xh. u arrestua për veprat penale “Vjedhje e mbetur në tentativë”, kryer në bashkëpunim, “Mosbindje ndaj urdhrit të Policisë” dhe “Largim nga vendi i aksidentit”. 17-vjeçarja u arrestua për “Vjedhje e mbetur në tentativë”, kryer në bashkëpunim, “Drejtim mjeti në mënyrë të parregullt”, “Shkatërrim i pronës” dhe “Mosbindje ndaj urdhrit të Policisë”.
Si provë materiale u sekuestruan dy automjetet: ai i tentuar për t’u vjedhur dhe ai i autorëve. Materialet iu referuan Prokurorisë për veprime të mëtejshme.