Një 24-vjeçar shqiptar u arrestua në Vittorio Veneto të provincës së Trevizos në Itali, pasi kishte shndërruar dhomën e gjumit në laborator për prerje dhe paketim kokaine.
Arrestimi u krye të premten në mëngjes nga karabinierët e njësisë së operacioneve dhe mobile. Gjatë kontrollit në apartament u gjetën rreth 1 kg kokainë, 36 mijë euro cash në kartëmonedha me prerje të ndryshme, peshore precize dhe prova të tjera materiale.
Hetimi filloi për të goditur trafikun e drogës në zonën e Coneglianos. Autoritetet monitoruan vendet e jetës së natës në bregun e majtë të lumit Piave, duke vënë në survejim lëvizjet, furnizuesit, bashkëpunëtorët dhe klientët e dyshuarit. Klientët përfshinin sipërmarrës të njohur, studentë nga familje të pasura, profesionistë dhe të tjerë me aftësi të larta shpenzimi.
Gjyqtari konfirmoi urdhër-arrestin të shtunën dhe e vendosi fillimisht në paraburgim 24-vjeçarin, të përfaqësuar nga avokati Danilo Riponti. Aktualisht, ai mbahet në arrest shtëpiak në pritje të vazhdimit të hetimeve dhe gjyqit.