Policia greke ka vënë në pranga një 26-vjeçar, shtetas i huaj, në lidhje me vdekjen e shtetases skoceze Elisabeth-Jane Ross. Viktima 38-vjeçare, e njohur nga familjarët edhe si Lisa, u gjet e pajetë më 18 korrik brenda një valixheje në një godinë të braktisur në zonën e Kypselit, në Athinë. Identifikimi i saj u bë nëpërmjet gjurmëve të gishtërinjve, ndërsa hetimet paraprake sugjeruan se ajo kishte ndërruar jetë pesë deri në shtatë ditë përpara zbulimit të trupit.
Sipas informacioneve nga policia, i dyshuari u identifikua pas analizimit të pamjeve të kamerave të sigurisë dhe bashkëpunimit me autoritetet në Britani të Madhe, Skoci dhe SHBA. Gjatë marrjes në pyetje të zhvilluar të enjten, i riu, i cili raportohet nga media britanike se është me origjinë nga Afganistani, ka pranuar autorësinë e krimit. Hetuesit dyshojnë se ai e ka transportuar trupin e viktimës me një valixhe dhe më pas ka përdorur kartën bankare të 38-vjeçares për të tërhequr para. Po ashtu, gjatë periudhës pas vdekjes së viktimës, telefoni i saj celular është përdorur nga një person tjetër për të dërguar mesazhe duke u shtirur si ajo.
Elisabeth-Jane Ross kishte mbërritur në Greqi më 26 qershor. Fillimisht ajo kishte qëndruar me miq në Pire deri më 10 korrik, kur ishte larguar drejt një destinacioni të panjohur në rajonin e Atikës. Në banesën e të arrestuarit, policia gjeti dhe sekuestroi një pistoletë dhe një thikë. Ndaj tij rëndojnë akuzat për vrasje, grabitje dhe shkelje të legjislacionit për armët.
Zyra e Jashtme e Mbretërisë së Bashkuar po ofron mbështetje konsullore për familjen e viktimës, ndërsa Policia e Skocisë ka konfirmuar se po vijon bashkëpunimin me autoritetet greke për zbardhjen e plotë të ngjarjes.
Përditësime
Hetuesit kanë zbardhur lëvizjet e fundit të Elisabeth-Jane Ross, 38-vjeçarja nga Edinburgu, e cila kishte planifikuar një takim me miq amerikanë përpara se të humbiste kontaktet. Ndërkohë, trupi i pajetë u gjet në një ndërtesë të braktisur nga një person i pastrehë, i cili njoftoi menjëherë autoritetet.
Hetimet mbi vrasjen e shtetases skoceze në Athinë kanë zbardhur dinamikën e krimit dhe përpjekjet e të dyshuarit për të shmangur drejtësinë. 26-vjeçari ka pranuar vjedhjen e 10 mijë eurove nga llogaritë bankare të viktimës përmes kartave të saj, ndërsa për të devijuar hetimet, ai dërgoi mesazhe të rreme duke u paraqitur si 'xhihadist'. Policia konfirmoi se arma e gjetur në banesë ishte një replikë plastike. Ndërkohë, pamjet e kamerave të sigurisë tregojnë të dyshuarin duke transportuar valixhen me qetësi në zonën e Eksarkisë. Lidhur me ngjarjen, i dyshuari pretendoi se e gjeti viktimën të pajetë në apartamentin, për të cilin dispononte çelësat, dhe se veproi në atë mënyrë për të shmangur përfshirjen e tij.
Hetuesit kanë korrigjuar kronologjinë e ngjarjes, duke konfirmuar se viktima Elisabeth-Jane Ross ka mbërritur në Greqi më 29 qershor, dhe jo më 26 qershor, për angazhime vullnetare. Pamjet filmike dëshmojnë se i dyshuari po transportonte valixhen në rrugën Evelpidon, më 10 korrik në orën 22:43. Po ashtu, policia ka identifikuar banesën e përbashkët të të dyshuarit dhe partneres së tij në lagjen Eksarkia.