Hetuesit e stacionit policor në Ferizaj kanë finalizuar një operacion hetimor, duke arrestuar një shtetas 28-vjeçar të identifikuar me inicialet R.Gj., nën dyshimin për kryerjen e veprës penale “Shtrëngim”.
Sipas njoftimit zyrtar të Policisë, rasti është iniciuar më 26 qershor 2026, pas raportimit se i dyshuari kishte përdorur llogari me emra të rremë në rrjetet sociale për të komunikuar me një të mitur. Nëpërmjet këtij komunikimi, ai e kishte kanosur viktimën me publikimin e fotografive të saj.
Pas veprimeve intensive hetimore dhe në koordinim me Prokurorin e Shtetit, autoritetet arritën ta identifikonin dhe ta ndalonin të dyshuarin më 4 korrik 2026 në një pikëkalim kufitar. Pas intervistimit, në prani të avokatit mbrojtës, me urdhër të prokurorit, ndaj R.Gj. është vendosur masa e ndalimit prej 48 orësh. Policia bëri të ditur se hetimet mbi këtë rast vazhdojnë për të zbardhur të gjitha rrethanat e ngjarjes.