Policia e Shtetit ka vijuar kontrollet në Kavajë për parandalimin dhe goditjen e armëmbajtjes pa leje, duke finalizuar operacionin e koduar “Fast”.
Në kuadër të këtij operacioni, shërbimet e Komisariatit të Policisë Kavajë, në bashkëpunim me Forcën e Posaçme Operacionale të Drejtorisë Vendore të Policisë Durrës, kanë lokalizuar dhe arrestuar shtetasin Florjan Rrokajt, 32-vjeç, banues në Kavajë.
Ai u kap në lagjen nr. 2 të qytetit, teksa lëvizte në këmbë. Gjatë kontrollit fizik, policia i gjeti dhe sekuestroi një armë zjarri pistoletë me municion luftarak, të cilën e mbante pa leje në çantë.
Në përfundim të veprimeve procedurale, Florjan Rrokajt u arrestua në flagrancë. Materialet hetimore iu referuan Prokurorisë pranë Gjykatës së Juridiksionit të Përgjithshëm Durrës për veprën penale “Mbajtja pa leje dhe prodhimi i armëve, armëve shpërthyese dhe municionit”.