Policia italiane në Padova ka arrestuar një 33-vjeçar shqiptar pas një kontrolli rutinë në autostradë, pranë zonës së shërbimit Limenella. Arrestimi erdhi pasi automjeti me të cilin udhëtonte u ndal për shkak të shpejtësisë së lartë. Gjatë verifikimeve, drejtuesi shfaqi sjellje nervoze dhe nuk dha shpjegime të qarta rreth destinacionit të tij.
Efektivët vunë re se i riu kishte krahun dhe dorën të fashuar, ndërsa ai pretendoi se ishte lënduar gjatë një përleshjeje me persona të panjohur. Për shkak të dyshimeve të ngritura, automjeti u dërgua në Komisariatin e Padovës për një kontroll të imtësishëm. Hetuesit zbuluan një mekanizëm elektronik të sofistikuar që aktivizonte një hapësirë të fshehtë, ku ishte vendosur pakoja me mbi 1 kilogram kokainë të pastër.
Sipas vlerësimeve të policisë, sasia e sekuestruar kap një vlerë prej më shumë se 30 mijë euro në tregun me shumicë, ndërsa mund të arrinte në mbi 100 mijë euro nëse shitej në doza të ndara. I arrestuari përballet me akuzën e posedimit të lëndëve narkotike me qëllim trafikimin. Pas ndalimit, ai është dërguar në burgun e Padovës, ku po pret masën e sigurisë. Kreu i Policisë së Padovës, Marco Odorisio, ka konfirmuar gjithashtu fillimin e procedurave administrative për heqjen e lejes së qëndrimit të 33-vjeçarit në territorin italian.
Përditësime
Autoritetet italiane kanë sqaruar detajet lidhur me 33-vjeçarin shqiptar të arrestuar në Padova për trafik kokaine. Megjithëse ai rezulton me vendbanim zyrtar në Matera, aktualisht banon në provincën e Bergamos.