Shtetasja Kumrie Zika është vënë në pranga nga Policia e Tiranës, pas denoncimit për vjedhjen e një shume parash në një subjekt të këmbimit valutor dhe transfertave në zonën e Vorrit të Bomit.
Sipas hetimeve, Zika ishte punësuar në këtë biznes pasi ishte paraqitur si punëkërkuese. Gjatë ditës së parë të punës, duke shfrytëzuar një moment shkëputjeje të punonjësit tjetër, ajo ka marrë nga arka shumën prej 5 mijë eurosh dhe është larguar me shpejtësi. Identifikimi i saj u bë përmes kamerave të sigurisë, ndërsa arrestimi u finalizua pak orë më pas në zonën e 21 Dhjetorit.
Burimet policore bëjnë me dije se 33-vjeçarja është e përfshirë në të paktën 3 ose 4 raste të tjera të ngjashme, ku ka përdorur të njëjtën metodë për të përvetësuar shuma më të vogla parash. E arrestuara pritet të dalë para gjykatës për t'u njohur me masën e sigurisë për akuzën e vjedhjes.