Një ngjarje e rëndë ka ndodhur mëngjesin e kësaj të enjteje në zonën e Kombinatit në Tiranë, ku një konflikt për linjën e ujit të pijshëm përfundoi me plagosjen e administratorit të një pallati. 35-vjeçari Klevis Leka është vënë në prangat e shërbimeve të Komisariatit të Policisë Nr. 6, pasi dyshohet se ka sulmuar me mjete prerëse shtetasin F.G., 74 vjeç.
Sipas njoftimit të policisë, autoritetet mbërritën menjëherë në vendngjarje, në rrugën “Aleksandri i Madh”, pas marrjes së njoftimit për të dëmtuarin. Nga hetimet paraprake rezultoi se midis palëve kishte nisur një debat për linjën e ujit të pijshëm në ambientet e pallatit, i cili degjeneroi në përdorimin e forcës. Policia sekuestroi në cilësinë e provës materiale një thikë dhe një motorsharrë, të cilat dyshohet se janë përdorur nga 35-vjeçari gjatë konfliktit.
I dëmtuari është transportuar në spital, ku ndodhet nën kujdesin e mjekëve. Materialet procedurale i kanë kaluar Prokurorisë për veprime të mëtejshme hetimore, me qëllim zbardhjen e plotë të rrethanave të këtij rasti.