Shërbimet e Komisariatit të Policisë Bulqizë kanë vënë në pranga një 39-vjeçar, pasi dyshohet se ka shkaktuar shqetësim në komunitet duke qëlluar me armë zjarri në ajër. Ngjarja ka ndodhur në fshatin Shtushen, ku pas njoftimit për të shtënat, policia organizoi veprime të shpejta për kapjen e autorit.
Shtetasi i arrestuar, i identifikuar nga policia me inicialet L. K., u ndalua pas kontrolleve të zhvilluara nga uniformat blu. Gjatë operacionit, në cilësinë e provës materiale u sekuestrua një armë zjarri automatik, e shoqëruar me 4 krehëra dhe 47 fishekë luftarakë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër. Ndaj 39-vjeçarit rëndojnë akuzat për veprat penale "Mbajtja pa leje dhe prodhimi i armëve, armëve shpërthyese dhe i municionit" dhe "Prishja e qetësisë publike".