Një shtetas shqiptar 44-vjeçar është arrestuar nga autoritetet policore greke pas një serie vjedhjesh të kryera në zonat e Evias dhe Fthiotidës. I dyshuari, i cili banonte në zonën e Istiaias, kishte hyrë në Greqi në mënyrë të paligjshme që prej vitit 2021.
Sipas hetimeve, ngjarjet nisën të enjten, kur 44-vjeçari vodhi një automjet nga oborri i një banese në Edipsos dhe u largua drejt Fthiotidës. Të nesërmen, ai hyri me forcë në shtëpinë e një mësueseje në Nea Anhialos, nga ku mori bizhuteri, ora, një kompjuter portativ, një tablet dhe sende të tjera me vlerë.
Zbulimi i autorit u mundësua nga vetë pronarja e tabletit, e cila, përmes funksionit të gjurmimit, lokalizoi vendndodhjen e pajisjes në zonën e Glyfas. Pas njoftimit të menjëhershëm, forcat e Stacionit të Policisë së Stildës gjetën sendet e vjedhura brenda automjetit, i cili rezultoi gjithashtu i përvetësuar në mënyrë të paligjshme.
Në momentin e ndërhyrjes së policisë, 44-vjeçari ndodhej në plazh. Ai tentoi të arratisej me vrap, por u neutralizua dhe u prangos nga efektivët pas një ndjekjeje të shkurtër.