Policia greke, nëpërmjet Departamentit të Menaxhimit të Emigracionit në Thermi, njoftoi se ka arrestuar një shtetas shqiptar 60-vjeçar gjatë pasdites së të premtes. Ndaj tij ishte lëshuar një urdhër-arresti nga Oficeri Hetues i Selanikut për akuzën e shkeljes së pronës.
Krahas kësaj mase, personi në fjalë figuronte si person i kërkuar ndërkombëtar me një “Njoftim të Kuq” të lëshuar nga Interpoli. Sipas të dhënave të policisë, kërkimi lidhet me një rast mashtrimi të kryer në Shqipëri gjatë vitit 2014, për të cilin 60-vjeçari është dënuar me 3 vjet burg.
I arrestuari është dërguar pranë autoriteteve gjyqësore kompetente, të cilat do të vijojnë me procedurat përkatëse për ekstradimin e tij drejt Shqipërisë.
Përditësime
Autoritetet konfirmuan se 60-vjeçari ka qëndruar në arrati për 10 vite, që prej vitit 2014. I arrestuari rezulton se nuk ka shlyer asnjë ditë nga dënimi i formës së prerë prej 3 vitesh burg për veprën penale të mashtrimit.