Autoritetet policore në Greqi kanë vënë në pranga 48-vjeçarin shqiptar Geron Cecja, i cili rezultonte prej rreth dy dekadash në kërkim ndërkombëtar. Arrestimi u krye mesditën e së mërkurës në zonën e Filothei të Athinës, nga një task-forcë speciale e Departamentit të Kërkimit të Policisë Greke.
Sipas akuzave të ngritura nga autoritetet shqiptare, 48-vjeçari, i datëlindjes 27 nëntor 1978, dyshohet se në vitin 2006 ka vrarë me armë zjarri një bashkatdhetar të tij në Tiranë. Për disa burime, viktima raportohet të ketë qenë shok i të arrestuarit, ndërsa burime të tjera specifikojnë se ngjarja ka ndodhur në vendlindjen e tij, në Tepelenë. Pas ndalimit, i arrestuari është dërguar në Prokurorinë Publike kompetente në Greqi, ku pritet të nisin procedurat ligjore për ekstradimin e tij drejt Shqipërisë, për t'u përballur me drejtësinë.
Operacioni për kapjen e tij u realizua pas informacionit mbi vendndodhjen e saktë të të kërkuarit. Çështja tashmë i ka kaluar organeve të drejtësisë greke për të shqyrtuar kërkesën e palës shqiptare lidhur me ekstradimin.