Shtetasi Albert Kapllanaj, 58 vjeç, është arrestuar në Greqi me qëllim ekstradimin e tij drejt Shqipërisë. Operacioni për kapjen e tij, i koduar "The Wanted", u zhvillua në bashkëpunim të ngushtë ndërmjet autoriteteve policore shqiptare dhe atyre greke.
Kapllanaj rezulton i dënuar nga Gjykata e Shkallës së Parë e Juridiksionit të Përgjithshëm Fier me vendim të datës 27 qershor 2013. Gjykata e ka shpallur fajtor atë për veprat penale:
- "Vrasje me dashje"
- "Vrasje me dashje", mbetur në tentativë
- "Mbajtja pa leje dhe prodhimi i armëve, armëve luftarake dhe i municionit"
Ngjarja për të cilën ai është dënuar daton në vitin 1999. Sipas dosjes hetimore, gjatë një konflikti për motive të dobëta, 58-vjeçari qëlloi me armë zjarri në drejtim të tre personave. Si pasojë, humbi jetën shtetasi me iniciale A. F., ndërsa dy familjarë të tij mbetën të plagosur. Aktualisht, po ndiqen procedurat ligjore për ekstradimin e tij në Shqipëri, ku do të vijojë vuajtjen e 6 viteve të mbetura nga dënimi me burg.