Autoritetet në Mal të Zi kanë arrestuar një 52-vjeçar shqiptar, i cili ishte shpallur në kërkim ndërkombëtar nga drejtësia greke. I dyshuari akuzohet për përdhunimin e një të reje në një plazh të izoluar në Kassandra të Halkidikisë, ngjarje e regjistruar më 30 maj 2022.
Sipas dëshmisë së viktimës, e cila në atë kohë ishte 22 vjeçe dhe punonte në një hotel të zonës, sulmi ndodhi në momentet kur ajo po qëndronte në plazh përpara se të niste turnin e punës. Ajo ka përshkruar momentet e vështira të sulmit, duke pohuar se autori e ka goditur dhe përdhunuar pasi i është afruar në plazh.
Zbardhja e ngjarjes dhe identifikimi i autorit u bënë të mundura përmes analizave laboratorike të materialit gjenetik. Hetuesit gjetën gjurmë të ADN-së në shtratin e banesës ku jetonte 52-vjeçari në atë kohë, të cilat u përputhën me provat e mbledhura gjatë hetimeve. Në fazat fillestare të hetimeve, autoritetet kishin shqyrtuar edhe përfshirjen e një personi tjetër, por dyshimet ndaj tij u hodhën poshtë për mungesë provash.
Pas ngjarjes, 52-vjeçari u largua nga Greqia, duke detyruar autoritetet të lëshonin një urdhër-arrest evropian. Avokatja e viktimës, Anthoula Anasoglou, e ka vlerësuar arrestimin si një hap të rëndësishëm për vënien e drejtësisë në vend pas katër vitesh. Aktualisht, kanë nisur procedurat ligjore për ekstradimin e të dyshuarit drejt Greqisë, ku ai do të përballet me akuzat përkatëse para autoriteteve gjyqësore.
Përditësime
Hetimet zbardhën detaje të reja mbi dinamikën e sulmit ndaj 22-vjeçares në plazhin e Halkidikisë. Viktima po shkonte në punë në një hotel të zonës dhe kishte ndaluar në plazh përpara turnit. Autoritetet greke njoftuan se autori i ishte afruar viktimës, i kishte folur, e më pas e kishte sulmuar nga pas. Viktimës i është dashur të përballet me traumën, duke deklaruar se: 'Mund të mos kisha dalë e gjallë'.