Autoritetet policore greke kanë nisur kërkimin për arrestimin e 64-vjeçarit shqiptar Mark Preci, i cili akuzohet për sulm seksual ndaj një vajze 25-vjeçare me aftësi të kufizuara në shtëpinë e saj në lagjen Kypseli të Athinës. Ngjarja ndodhi të dielën në mëngjes, ndërsa incidenti u regjistrua me video, ku shiheshin lëvizjet e autorit disa minuta para sulmit.
Sipas dëshmisë së nënës së vajzës, ajo kishte lënë shtëpinë për të shkuar në farmaci për rreth 10 minuta. Gjatë kësaj kohe, Mark Preci hyri në banesë, ku jetojnë dy binjake me aftësi të kufizuara. Ai dyshohet se ngacmoi seksualisht njërën prej tyre dhe sulmoi fizikisht të dytën duke e goditur me grushte.
Kur nëna u kthye, e gjeti Precin duke ngacmuar seksualisht njërën nga vajzat. Ajo mori një tigan dhe e goditi atë. Në përgjigje, ai e goditi me grusht nënën dhe vajzën tjetër. Pastaj, nëna mori një thikë dhe filloi ta ndiqte, çka bëri që shqiptari të largohej nga vendi.
Rasti ka shkaktuar shqetësim të madh tek banorët e zonës. Policia greke u bën thirrje banorëve dhe personave që kanë informacion për lëvizjet e Mark Prec-it të kontaktojnë shërbimet kompetente.