Një shtetas shqiptar është shpallur në kërkim nga policia greke pasi akuzohet se ka abuzuar seksualisht me një 25-vjeçare me aftësi të kufizuara dhe ka tentuar të abuzojë me motrën e saj binjake, po ashtu me aftësi të kufizuara.
Ngjarja ka ndodhur në zonën Kypseli. Nëna e vajzave e ka zbuluar incidentin përmes kamerave të sigurisë në banesë. Ajo ka parë të bijën duke qarë, është kthyer menjëherë në shtëpi dhe ka ndjekur autorin e dyshuar me thikë, por ai ka arritur të arratiset.
Sipas mediave greke si Protothema, shqiptari ndihmonte nënën me pazarët dhe banonte në të njëjtën zonë. Njëra nga vajzat dyshohet se ka pësuar abuzimin, ndërsa te tjetra autori nuk ka arritur të përfundojë aktin.
Të dyja motrat janë transportuar në spital për ekzaminime mjekësore. Nëna ndodhet në komisariat duke dhënë dëshminë. Policia ka nisur kërkimet për kapjen e të dyshuarit dhe hetimet janë në vijim.