Operacioni i koduar "The Wanted" ka mundësuar lokalizimin dhe prangosjen e Sabri Sopotit, 60 vjeç, në Mbretërinë e Bashkuar. Ndalimi i tij u bë i mundur falë koordinimit të shpejtë informativ dhe operacional ndërmjet Interpol Tiranës dhe Interpol Manchester.
Sipas vendimit të Gjykatës së Dibrës, 60-vjeçari është dënuar me 24 vite burgim për veprat penale të vrasjes me paramendim dhe mbajtjes pa leje të armëve luftarake e municionit. Ngjarja për të cilën ai është shpallur fajtor daton me 24 dhjetor 1999, kur Sopoti vrau me armë zjarri automatike shtetasin me inicialet B. K.
Aktualisht, Interpol Tirana po vijon procedurat administrative dhe ligjore me homologët britanikë për të finalizuar ekstradimin e tij drejt Shqipërisë, ku ai do të vuajë dënimin e dhënë nga drejtësia shqiptare.