Pas një hetimi intensiv, shërbimet e Komisariatit të Policisë Lushnjë, në bashkëpunim me Drejtorinë Vendore të Policisë Durrës, finalizuan operacionin e koduar “Zjarrvënësi”, duke bërë të mundur lokalizimin dhe prangosjen e Klodian Çinës. 48-vjeçari, i cili ishte shpallur më herët në kërkim, dyshohet se në orët e para të mëngjesit të datës 19 maj 2026 i ka vënë zjarrin tregut të fruta-perimeve, të vendosur në lagjen “Xhevdet Nepravishta”.
Hetuesit kanë sekuestruar si provë materiale një biçikletë, për të cilën Çina dyshohet se është autor i vjedhjes dhe se e ka përdorur atë për të lëvizur në qytet dy ditë para ngjarjes. Nga këqyrja e pamjeve filmike, është konstatuar prania e një personi tjetër pranë të dyshuarit, por deri në këtë fazë të hetimeve, autoritetet theksojnë se ky person nuk rezulton të jetë i implikuar në zjarrvënie.
Zjarri shkaktoi dëme të konsiderueshme, duke shkrumbuar strukturën dhe produktet e rreth 25 tregtarëve. Ky treg frekuentohet nga rreth 150 tregtarë, të cilët pritet të vijojnë aktivitetin e tyre në një hapësirë pranë vendngjarjes deri në riparimin e dëmeve. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprat penale “Shkatërrimi i pronës me zjarr” dhe “Vjedhja”. Vijojnë veprimet për dokumentimin e plotë ligjor të rastit.