Autoritetet policore në Greqi, konkretisht Departamenti i Hetimit dhe Ndjekjes Penale të Krimeve në Follorinë, kanë finalizuar një operacion antidrogë që çoi në prangosjen e një shtetasi shqiptar 68-vjeçar. Arrestimi u krye pas shfrytëzimit të informacioneve operative, kur efektivët lokalizuan automjetin e drejtuar nga i dyshuari në një zonë të Follorinës.
Gjatë kontrollit të detajuar të mjetit, policia gjeti dy çanta udhëtimi dhe një thes, brenda të cilëve ndodheshin 50 pako me marijuanë, me një peshë totale bruto prej 55 kilogramë e 422 gramë. Përveç lëndës narkotike, policia sekuestroi edhe 3 telefona celularë, të cilët do t'i nënshtrohen hetimeve për zbardhjen e rrjetit të mundshëm kriminal.
Sipas të dhënave zyrtare, gjatë 11 muajve të fundit, policia greke ka intensifikuar kontrollet në zonat e Igumenicës, Janinës, Kosturit, Follorinës dhe Selanikut, duke sekuestruar mbi 1.2 ton marijuanë. Autoritetet vërejnë një riaktivizim të trafikut përgjatë vijës kufitare, ku linja Sarandë–Igumenicë vijon të mbetet itinerari kryesor i shfrytëzuar nga trafikantët. Në një rast të mëparshëm, autoritetet greke kanë bllokuar në Igumenicë edhe një skaf të ngarkuar me lëndë narkotike.