Aktivisti Edison Lika është shoqëruar në Komisariatin nr. 1 të Tiranës, pasi është arrestuar nga Policia e Shtetit gjatë protestës së zhvilluar mbrëmjen e sotme përpara Kryeministrisë. Lika akuzohet se ka goditur me vezë automjetin në të cilin dyshohej se po udhëtonte kryeministri Edi Rama.
Incidenti ndodhi në momentin kur automjeti po dilte nga ambientet e Kryeministrisë, duke kaluar pranë kryqëzimit përballë Radio Televizionit Shqiptar (RTSH). Sipas burimeve, Lika ka ndërmarrë veprimin duke qëlluar drejt mjetit, çka solli reagimin e menjëhershëm të efektivëve të policisë që ndodheshin në terren për të siguruar perimetrin e institucionit.
Pas një ndjekjeje të shkurtër në vendngjarje, forcat e rendit kanë bërë të mundur arrestimin e Likës. Pas shoqërimit në ambientet e Komisariatit nr. 1, ndaj tij kanë nisur veprimet e mëtejshme procedurale lidhur me incidentin e regjistruar gjatë protestës.
Protestuesit ishin mbledhur sërish para godinës së Kryeministrisë pas një marshimi, të bindur se kryeministri ndodhej brenda ambienteve. Eskortat e sigurisë, të përbëra nga motorë të policisë, automjete zyrtare dhe fuoristrada, ishin pjesë e masave të shtuara që shoqëruan lëvizjet në zonë, e cila ka qenë prej kohësh skenë e protestave të vazhdueshme para institucioneve qendrore.
Përditësime
Aktivisti Edison Lika u shoqërua në Komisariatin nr. 1 pasi qëlloi me vezë makinën e kryeministrit Edi Rama.