Policia e Korçës ka njoftuar arrestimin e Edmond Firajt, i dyshuar si autori i plagosjes me thikë të një të riu 23-vjeçar. Ngjarja është shënuar në fshatin Moravë dy ditë më parë.
Sipas grupit hetimor, konflikti mes palëve ka nisur pas një debati për një borxh financiar. I riu kishte shkuar në fshat për të kërkuar kthimin e parave, por situata ka degraduar në një përplasje fizike, gjatë së cilës është përdorur mjeti prerës. Për pasojë, 23-vjeçari ka marrë një plagë në pjesën e barkut, por ndodhet jashtë rrezikut për jetën.
Autori i dyshuar është lokalizuar nga forcat e rendit një ditë pas ngjarjes. Në momentin e ndalimit, Edmond Firaj ka qenë në gjendje të dehur, çka ka detyruar policinë që fillimisht ta dërgojë atë në spital për të marrë ndihmë mjekësore. Pas stabilizimit të gjendjes, ai është shoqëruar në ambientet e komisariatit për veprime të mëtejshme procedurale. Policia vijon hetimet për zbardhjen e plotë të rrethanave të këtij rasti.