Një konflikt për motive të dobëta midis dy shtetasve në qytetin e Korçës ka përfunduar me plagosjen e rëndë të 42-vjeçarit Rigels Janaqi. Ngjarja është shënuar në lagjen numër 14, në afërsi të shkollës Demokracia.
Sipas njoftimit të autoriteteve, autori i dyshuar është Gëzim Ramka, 54 vjeç, i cili u arrestua menjëherë nga shërbimet e policisë pas ngjarjes. I dëmtuari u dërgua me urgjencë në Spitalin Rajonal të Korçës, ku mjekët konstatuan se thika i ka prekur zonën cervikale, duke rrezikuar jetën e tij. Për shkak të natyrës së ndërlikuar të lëndimit, pacienti është planifikuar të dërgohet për mjekim të specializuar në Spitalin e Traumës në Tiranë.
Burime bëjnë me dije se si i plagosuri ashtu edhe autori dyshohet se vuajnë nga probleme të shëndetit mendor. Grupi hetimor po vijon punën për të zbardhur rrethanat e sakta të ngjarjes dhe motivet që çuan në përshkallëzimin e konfliktit fizik.
Përditësime
Hetimet e Policisë së Korçës zbardhën dinamikën e ngjarjes, ku pas një konflikti për motive të dobëta mes fqinjëve, një 54-vjeçar qëlloi viktimën dy herë me thikë. Autori u arrestua nga efektivët në banesën e tij pak minuta pas sulmit.