Një ngjarje e rëndë ka ndodhur në Korçë, ku një person ka pësuar lëndime trupore pas një konflikti fizik. Ngjarja, e cila është regjistruar në lagjen nr. 1, e ka zanafillën nga një debat verbal mes dy personave një natë më parë, i cili është përshkallëzuar ditën e sotme.
Sipas të dhënave paraprake, gjatë konfrontimit fizik, njëri prej personave dyshohet se ka përdorur një sëpatë për të goditur kundërshtarin në zonën e shpatullës. I dëmtuari është dërguar menjëherë në spitalin e qytetit për marrjen e ndihmës mjekësore. Burimet spitalore njoftojnë se ai ndodhet jashtë rrezikut për jetën.
Forcat e rendit kanë mbërritur në vendin e ngjarjes dhe kanë bërë të mundur shoqërimin e autorit të dyshuar në komisariat. Grupi hetimor, nën drejtimin e prokurorisë, vijon punën për dokumentimin e plotë të rrethanave të ngjarjes.