Pasditen e kësaj të shtune, një konflikt në lagjen nr. 8 të qytetit të Korçës, konkretisht në rrugën “Viktimat e Ravonikut”, ka degjeneruar në përdorimin e mjeteve të forta. Sipas raportimeve, përplasja ka ndodhur mes fqinjëve dhe ka shkaktuar plagosjen e dy personave.
Të dëmtuarit janë transportuar menjëherë për në Spitalin Rajonal të Korçës, ku po marrin ndihmën e nevojshme mjekësore. Edhe pse përleshja ka qenë e dhunshme, të plagosurit ndodhen jashtë rrezikut për jetën. Siç raportohet nga Euronews Albania, konflikti e ka pasur zanafillën nga një grindje mes fëmijëve të familjeve, e cila më pas është përshkallëzuar mes të rriturve. Gjatë përplasjes, përveç personave, raportohet se është dëmtuar edhe një automjet që ndodhej në vendin e ngjarjes.
Efektivët e policisë kanë mbërritur në vendngjarje për të normalizuar situatën dhe për të nisur hetimet. Deri më tani, disa persona janë shoqëruar në ambientet e Komisariatit të Korçës për të sqaruar dinamikën dhe shkaqet e plota të këtij incidenti.
Përditësime
Hetimet zbardhën dinamikën e konfliktit në zonën e Radanecit, lagjja nr. 8. Policia konfirmoi se përplasja përfshiu dy vëllezër kundër dy fqinjëve të tyre. Të plagosurit kanë pësuar dëmtime në kokë, të shkaktuara nga goditjet me drunj dhe mjete të tjera të forta. Autoritetet shoqëruan në komisariat të katër personat e përfshirë në incident.
Hetimet e Policisë së Korçës konfirmuan përdorimin e mjeteve të forta, konkretisht lopatave, gjatë përplasjes fizike në lagjen nr. 8. Këto mjete shkaktuan dëmtimet në kokë të dy personave të përfshirë në konflikt.