Më datën 3 gusht 2026, pak pas orës 22:00, zyrtarët e Policisë Kufitare në Stacionin për Mbikëqyrjen e Kufirit (SPMK) në Muçivërcë, identifikuan një automjet që po lëvizte nga drejtimi i fshatit Breznicë të Serbisë drejt territorit të Republikës së Kosovës. Operacioni u zhvillua në zonën e fshatit Karaqevë e Poshtme.
Pas ndalimit të automjetit në fshatin Novosellë, pasagjeri i identifikuar si Egzon Reshani ka tentuar t’u shmanget zyrtarëve policorë duke vrapuar në drejtim të vijës kufitare, përkatësisht drejt fshatit Breznicë në Serbi. Falë ndërhyrjes së shpejtë, policia ka arritur ta ndalojë dhe arrestojë të dyshuarin në afërsi të kufirit, duke parandaluar kështu largimin e tij nga territori i vendit.
Ndaj Egzon Reshanit ekzistonte urdhërarrest aktiv, pasi i njëjti kërkohej nga organet e drejtësisë për disa vepra të rënda penale, përfshirë:
• Vrasje në tentativë
• Fajde
• Privim i kundërligjshëm i lirisë
• Detyrim
Gjatë kontrollit fizik, policia i ka gjetur dhe sekuestruar një thikë, ndërsa me urdhër të prokurorit është iniciuar rasti për veprën penale “Armëmbajtje pa leje”. Pas përfundimit të procedurave nga Policia Kufitare, i dyshuari u është dorëzuar njësive kompetente të Drejtorisë Rajonale të Policisë në Prizren për procedime të mëtejshme ligjore.
Në të kaluarën, Egzon Reshani kishte publikuar video në rrjete sociale ku kërcënonte zyrtarë policorë dhe prokurorë të Prizrenit.
Përditësime
Prokuroria ka kërkuar zyrtarisht caktimin e masës së paraburgimit ndaj Egzon Reshanit, i cili u arrestua së fundmi në kufirin me Serbinë. Dosja ndaj tij është zgjeruar me veprën penale 'Frikësimi gjatë procedurës penale' në vazhdimësi. Organet e akuzës argumentojnë se ekziston rreziku i ikjes dhe pengimit të hetimeve, duke pasur parasysh se ndaj të dyshuarit ishin lëshuar më parë letër-rreshtime vendore dhe ndërkombëtare. Reshani është gjithashtu subjekt i procedurave të tjera aktive në Departamentin për Krime të Rënda dhe në Prokurorinë Speciale të Republikës së Kosovës.