Drejtoria Rajonale e Policisë në Prizren, përmes Sektorit Rajonal të Hetimeve, po zhvillon hetime intensive për veprën penale vrasje në tentativë, të ndodhur më 5 janar 2026, rreth orës 22:50, në rrugën Ali Hadri në Prizren.
Si pasojë e të shtënave me armë zjarri, dy persona kanë mbetur të plagosur. Ata u dërguan menjëherë për trajtim mjekësor në Emergjencën e Spitalit Rajonal të Prizrenit. Ekipi mjekësor ka konfirmuar se të plagosurit janë jashtë rrezikut për jetë dhe po vazhdojnë trajtimin e mëtejmë.
Policia ka identifikuar dhe arrestuar disa persona të përfshirë në rast. Megjithatë, një i dyshuar vazhdon të jetë në arrati. Ai quhet Egzon Besim Reshani, i lindur më 5 korrik 1992, me vendbanim në rrugën Shkëlzen Dragaj, nr. 10, Prizren.
Me qëllim të ndriçimit të plotë të rastit dhe arrestimit të të dyshuarit, Policia e Kosovës kërkon bashkëpunimin e qytetarëve. Çdo informacion për vendndodhjen e Egzon Besim Reshanit mund të raportohet në numrin 192 të policisë në Prizren, përmes rrjeteve sociale zyrtare të policisë ose në çdo stacion policor në Kosovë. Policia garanton konfidencialitet të plotë për ata që ofrojnë informacione.