Policia e Kosovës ka njoftuar se ka identifikuar tre të dyshuar për plagosjen e një personi me armë zjarri, e cila ndodhi më 11 janar 2026 në Pejë. Ngjarja u raportua fillimisht nga Prokuroria Themelore në Pejë, e cila konfirmoi se po punohet intensivisht për identifikimin e autorëve, me prokurorin e krimeve të rënda të pranishëm në vendin e ngjarjes bashkë me policinë.
Më 12 janar 2026, Drejtoria Rajonale e Policisë në Pejë publikoi emrat, datat e lindjes dhe fotografitë e të dyshuarve, me autorizim nga prokuroria. Të pandehurit kërkohen për veprën penale vrasje e mbetur në tentativë dhe janë:
• Arian (Misin) Qelaj, i lindur më 20.06.1981 në fshatin Maznik, Deçan.
• Yll (Arian) Qelaj, i lindur më 29.07.2003 në fshatin Maznik, Deçan.
• Altin (Rifat) Qelaj, i lindur më 01.10.2005 në fshatin Maznik, Deçan.
Të tre dyshohen se janë të përfshirë në incidentin e djeshëm dhe kanë ikur pas ngjarjes. Policia thekson se qëllimi i publikimit është lokalizimi dhe arrestimi i tyre.
Autoritetet kanë bërë thirrje publike për bashkëpunim nga qytetarët. Kushdo që posedon informacion për vendndodhjen e të dyshuarve, mund ta njoftojë policinë përmes numrave 192 ose 0800 19999 (pa pagesë), ose në 039 432 327 të Drejtorisë Rajonale në Pejë. Gjithashtu, mund të dërgohet email në adresën info@kosovapolice.com ose të paraqiten në stacionin policor më të afërt. Policia garanton konfidencialitetin e informacioneve të marra.