Një sulm me armë zjarri është shënuar mesditën e sotme në fshatin Pagarushë të komunës së Malishevës, ku një person ka hapur zjarr në drejtim të një autobusi me udhëtarë. Zëdhënësja e Policisë për Rajonin e Gjakovës, Vlera Krasniqi, bëri të ditur se informacionet mbi ngjarjen janë pranuar rreth orës 12:10.
Pas marrjes së njoftimit, njësitë policore kanë mbërritur menjëherë në vendin e ngjarjes dhe kanë ndërmarrë veprimet e duhura hetimore. Si rezultat i këtyre veprimeve, policia ka identifikuar dhe arrestuar personin e dyshuar. Gjatë operacionit, autoritetet kanë sekuestruar një armë zjarri të tipit AK-47, e cila dyshohet se është përdorur në këtë sulm.
Sipas njoftimit zyrtar të Policsë së Kosovës, nga ky incident nuk është raportuar për persona të lënduar. I dyshuari, në koordinim me prokurorin e shtetit, është ndaluar për 48 orë, ndërsa rasti është iniciuar si “vrasje e rëndë në tentativë”. Hetimet për zbardhjen e plotë të rrethanave të ngjarjes janë duke vijuar.